Wednesday, October 14, 2009

ဘဲ အိမ်မက်



သူငယ်ချင်း....
တစ်နေ့ညဖက်
အိမ်မက် မက်၏။

အိမ်မက်ထဲမှာ ကြုံရပါ၏
ငါက " ဘဲ " ဖြစ်နေသတဲ့ ။

ငါနှင့်အတူ
ဘယ်သူဘယ်ဝါ ၊ မသိပါတည့်
ဝါ ပြာ နီ ညို ၊ အနက်ကိုယ်နှင့်
ငါလိုဘဲက သုံးလေးကောင်တဲ့။

ငါတို့သခင် ၊ ဘဲပိုင်ရှင်က
သားတင်မျိုးလုပ်၊ ဥမထုတ်တဲ့

ချုပ်စပ်ရွာနီး ၊ ပတ်မတီးလျှင်
ပွဲကြီးပွဲသေး ၊ ပွဲမရွေးတဲ့
လောင်းကြေးစားကြေး ၊ ငါးဆပေး၍
ဝဋ္ဋ်ကြွေးမကင်း ၊ တို့လည်ပင်းနှင့်
ကြိမ်ကွင်း အပစ်ခံသတဲ့။

လာပါပစ်ပါ ၊ လူခေါ်ရာ၌
ငါတို့သခင် ၊ အာသိပ်ရွှင်သတဲ့။

ပွဲခွင်လေဟာ ၊ ရွှေပွဲလာတို့
ဇာတ်မှာငုံးတိ ၊ လူမကြည့်တဲ့

ရှိသမျှလူစုံ ၊ တို့ဘဲရုံမှာ
ဝိုင်းအုံပြွတ်သိပ် ၊ အံတွေကြိတ်လျက်
မချိတ်မချင်း ၊ တို့လည်ပင်းကို
ကြိမ်ကွင်းတွေနှင့် ပစ်သတဲ့။

ပစ်လေရှောင်လေ ၊ ရှောင်လေ လွဲလေ
လွဲလေမဲလေ ၊ မဲလေရှုံးလေ
ရှုံးလေ ပစ်လေ
ကြိမ်ကွင်းတွေက ၊ လေထဲမှာဝဲ
တို့ဘဲတွေက ချွေးကျမစဲ။

အိမ်မက်ထဲက ၊ လန့်နိးထတော့
ငါ့မှာ ဟောဟဲ ၊ မောနေဆဲတည့်
အသည်းထိတ်စရာပဲ သူငယ်ချင်း



Saturday, October 10, 2009

မင်း...ဘယ်မှာလဲ

အထင်မှားနေတာပါလို့
လူကြားထဲ တစာစာအော်
ငါ..မင်းကို မရှင်းပြချင်ဘူး ဟန်နီ

အဆုံးသတ် နားလည်နိင်မှုမှာ
ရင်နှစ်ခုလုံး နာကျင်တာပဲ
ကျန်ခဲ့ရလိမ့်မယ်


အခု..မင်းဘယ်ရောက်နေလဲ
ငါမင်းကို...လိုက်ရှာနေတယ် ဟန်နီ
ဘ၀ကို ဘ၀နဲ့ ရင်းဝယ်ဖို့
မင်းအဲဒီလို...နောက်ဆုတ်လို့ မရဘူးလေ

ပြန်လာခဲ့ပါ..ဟန်နီ
ခဏလောက်ပဲ ဖြစ်ဖြစ်ပေ့ါ

Wednesday, October 7, 2009

အနေမတက်သူ



အမှန်ကိုချစ်တဲ့ ၊ အမှန်ကို ကျင့်တဲ့သူ
လူကြားထဲ နေလို့ မရဘူး


လူတွေကို မှန်အောင် ပြင်ကြည့်ရင်း
လူတွေကြားထဲ အမှန်ပြောရင်း
သူဟာ လူများစုရဲ့ ဖယ်ကျဉ်ခြင်းကို ခံရတက်တယ်

ကိုယ်ချို့ ယွင်းချက်ကို မမြင်ဘူး
သူများ မှားတာကို
အခွင့်ကောင်းယူပြီး နှိပ်ကွပ်တယ်

မနေနိင်လို့
အမှန်ကို ၀င်ပြောပြန်ရင်
ပြောတဲ့သူ အမုန်းခံရပြန်တယ်

လောကကြီးကလည်း
လူများစုကို မျက်နှာသာပေးနေပြန်တော့
ကြာတော့ အမှန်ပြောတဲ့ သူတွေလည်း
စိတ်ရောဂါ ရလာတော့တယ်






Thursday, October 1, 2009

ဆန္ဒ





ခင်ဗျားကလည်း ပြောချင်တာ ပြောတယ်
သူကလည်း လုပ်ချင်တာ လုပ်တယ်
ကျနော်နဲ့ တခြားသူတွေက
ဘေးကနေ ပြူးကြောင်ကြောင်နဲ့ ရပ်ကြည့်လို့

ခင်ဗျားက ဘာရလို့ ပြောလဲ ကျနော်မသိဘူး
သူကလည်း ဘာတွေရနေလို့ လုပ်ချင်တာ လုပ်နေတာလဲ မသိဘူး
သေချာတာက
ကျနော်နဲ့ တခြားသူတွေ
ဘ၀ကို စိတ်ကုန်နေကြပြီ

၂၀.. မှာ ဘာဖြစ်မယ်
ကျနော်နဲ့ တခြားသူတွေ မသိဘူး
သေချာတာက
၂၀၁၂ မှာ ကမ္ဘာကြီး ပျက်သွားရင် ပိုကောင်းမယ်